爽報 (財經V59, 2012.5.25)

90年代開始，政府刻意限制的士數目。1998年，「鐵路大晒」政策，要所有非鐵路交通工作讓路，香港的士嘅數目自此冇加冇減，只有18138架。
牌照數目不變，的士牌價就成為唯一變數。不過，1998到2004年，又衰退又通縮，的士牌數目上限，並無造成太大扭曲。的士司機為咗生計，反而要諗好多方法，例如電召八折，既方便住得遠、難叫車嘅市民，又慳番的士司機喺條街搵客嘅時間同成本。

呢啲就係市場變通嘅智慧。最終都係經濟誘因，令到「八折的」漸漸消失。一來，唔減價都做到停唔到手，邊個會減？二來，減價唔會令司機賺到更多，搵鬼減咩？今時今日，唔好話繁忙時間叫唔到「八折的」，好多時機場都叫唔到車，某程度上，都反映咗市場調節發生作用。

80年代初，的士牌數目暴增，揸的士係就業市場轉型時嘅緩衝區。?家剛好相反，車租貴、天然氣價貴，最低工資又搞到做保安仲好搵過揸的士，的士行業扭曲越來越嚴重，就算增加的士牌，幫助好有限。的士服務不足，最受影響就係出入唔方便嘅老人家或者傷殘人士。

經過咁多年，發牌制度好難變，只係希望政府會繼續畀的士司機留番少少變通嘅空間。如果呢樣都管死，就連少少生存嘅氧氣都冇埋。

利世民

專欄電郵：SharpHK.Simon＠gmail.com
Facebook專頁：www.facebook.com/AppleSimon