爽報 (財經V32, 2012.6.26)

「堅尼系數反映貧富懸殊。香港堅尼系數0.537，去到臨界點。」填鴨式教育嘅問題，就係人哋講乜，淨係記住啲數字，唔去諗吓有冇道理。

點先算有獨立思考？噚日，友報《am730》嘅施老闆永青專欄提出，人哋個數字量度成個國家，香港就係一個城市，將兩者相提並論，方法上有問題。

今日，我再畀多個觀點大家諗：堅尼系數亦反映香港社會多元，以及恒常嘅新移民人口。

外國有中小型城鎮，經濟規模單一，只靠一、兩樣農、工業，市民收入好平均，但係宏觀環境一旦轉變，可以即時好大件事。曾幾何時，美國有好多盛極一時嘅中小型城鎮，戰後沒落得好快，原因之一就係唔夠多元。

新移民流入　擴收入差距

好多人條件反射式話香港淨係得金融業。講呢類說話嘅人：一，唔知香港其實有大把其他嘢撈；二，唔知道金融業背後其實有一大抽服務配套支援，呢啲技能亦非常易轉移到其他行業工種。

香港另一個特點就係不斷有新移民加入。新移民好多經濟條件都比較差，所以令收入差距拉闊絕對唔出奇。調查貧窮問題，要睇同一班人向上流動有幾難。之前我有建議政府做長期跟蹤研究。不過佢哋話太難，唔做。

利世民

專欄電郵：SharpHK.Simon@gmail.com

Facebook專頁：www.facebook.com/AppleSimon