金手指 : 數曾特首埋下的炸彈
蘋果日報 (財經要聞B09, 2012.6.28)
呢篇《金手指》，將會係特首曾蔭權任內最後一篇文，
做得英女皇戰場上嘅打手，就會學到英國佬為未來接手既人埋下炸彈。當然，英國佬甚至曾特首都唔會無良到特登跣你一鑊甘，佢地只係落實咗D政策，為短期既政治困難過關，長遠將會係滅港隱憂。不過講衰既一邊之前，想先整啖沙糖。
無跟歐式福利值得讚
做得好既，首先有曾特首老早明白到歐洲式既福利制度係唔得，因為遲早爆煲。咁歐洲式既福利，最致命既地方就係唔會斷尾，亦即係經常性開支。曾特首用盡方法將龐大既盈餘搵D一次性，最好乜都做唔到既地方塞咗D錢，等D分身家既敗家社運份子同政客無咁易亂發要求。
第二，就係07年全球經濟就來爆既時候，無忽然增加土地供應。97年，亞洲金融風暴下推八萬五，結果除八、九十後外，香港人見包炭都會百感交集。
雖然，結果係樓市暴升，不過大家要記得97年國際貨幣基金組織等，叫出事國家做既野，就係正正今日德國叫希臘落實既政策。唯一分別係他朝亞洲人真係去做，今日白種人就選擇印銀紙。呢個真係無辦法。
最尾，有朋友話取消任何稅項都係好事，所以無咗紅酒稅要讚。不過以我既個人歷史，呢個我就比其他人讚。
講埋下既炸彈，不分先後，全都係有滅港威力。首先係最低工資，之前我驚佢會令好多後生仔女無得以低廉人工番工學野，咁雖然已經出現例如髮廊負責洗頭既學師，被機械取締，不過衣家好既地方係仲可以免費，好多後生亦無舉報D學嘢既Job。
不過工會遲早搞呢D學野後生仔同教佢地僱主既安排，到時候你要係邊個邊個既細姪先有得入行。
住公屋唔識人，又想靠肯捱同平博入金融業？唔使諗啦，乖乖地袋你既廿八蚊粒鐘。階級流動？哈。以前我都仲好嬲，不過友人一句：「You’re part of the elite class，so why so serious？」
為銀行包底遲早出事
第二，就係競爭法。人民力量用拉布反得既民粹法例，你已經知好有問題。咁我地香港係學歐盟個套，所以可以話條法例一定係會變成打外來競爭者或中小企既武器。我唔知香港人會唔會有日覺悟，選D會贊成條法例取消既議員。不過當律師既得利益集團成立後，佢地會用六四、民主、派錢等入番議會。
第三，派錢。將香港人變成澳門人，恭喜。
第四，亦係我本人覺得最大滅港隱憂。係08年雷曼爆破後，曾特首宣佈學愛爾蘭政府咁，為全香港所有銀行做擔保包底。咁唔同愛爾蘭既地方，就係香港人，由投資者到存戶一路都要承擔銀行出事風險，BCCI、百富勤都係好例子。就係咁，香港D銀行就被債主監察，無比銀行高層為花紅借爆買次按債賺息差。
最弊係除包底，曾特首仲繞過司法系統，壓D銀行為雷曼迷債上身，賠錢。咁包底兼賠錢後，試問邊有香港人會驚買錯野？或將50萬元既錢分開銀行擺？
如果再有事，梁特首咪學曾特首咁羅，不過到時就會係今日既愛爾蘭。佢地被德國接管，我地就係北京。不過呢個，可能都係團派編既劇，我地未來見到既「錯誤政策」，只不過係呢場劇一早寫落既情節。
孫柏文
作者為獨立股評人
本欄逢周二、四刊出