爽報 (財經V38, 2012.6.29)

特區成立十五周年，之前一個月，已經久不久聽到有人話，中央會送大禮。最抵死係，候任特首「思歪」個勢越差，份禮就會越大。不過，究竟份禮係乜呢？另外，乜香港人幾時變得全民「港孩」，要人送禮物嘅呢？

我都試過天馬行空咁諗，究竟有乜嘢政策係香港人最想要。港股直通車？真係開車至好喎！上次架直通車死火，恒指差少少就見32000點，溫總一句唔玩，直通車即刻變成過山車，一日直插1500幾點。我仲記得嗰年10月，有日成交過2000億元，幾好玩呀。可惜，成個直通車概念，得兩個月貨仔。

諗番轉頭，就算當年有直通車，亦唔見得今日恒指會有60000點，每日成交2000億元。畢竟，股票都要睇基礎因素。港股其實已經變咗炒大陸經濟嘅Proxy，所以，叫大陸錢買番港股，即係塘水滾塘魚，意義不大。

再講，大陸嘅熱錢來去匆匆，湧入嘅時候泡沫膨脹梗係有人開心，但係要走嘅時候，同樣點都留唔住。呢類虛幻嘢，我真係唔識講，對香港有乜長遠好處？但係對大陸，就可以多個調控壓力嘅出氣口，冇壞啫。

不如社保基金買港股？咪玩啦！至於乜嘢人民幣離岸中心地位、深圳前海金融區，似香港人服務祖國多啲喎！大禮，心領喇！

利世民

專欄電郵：SharpHK.Simon@gmail.com
Facebook專頁：www.facebook.com/AppleSimon