蘋果日報 (財經要聞B09, 2012.7.03)

剛剛過去既星期日，回歸15周年兼特首換屆，點樣歌舞昇平Believe in our dreams，都唔及40萬人遊行為大話精贈興咁搶鏡：CY一上台，果然團結咗香港市民。

睇番歷來七一遊行人數紀錄，最厲害係03和04年既老董時期，分別有50萬同53萬人上街抗議，全因當年沙士疫潮之下百業蕭條，失業率最高達到8.7%，呢D大家記憶猶新，都唔使孫柏文多講。正如影帝發哥所講：搵食，係香港核心價值。

派糖實多過煲呔

香港人，最想都係自由自在咁搵食啫。CY邊估到今時今日經濟暢旺，失業率只有3.2%之下，都有40萬人冒住暑熱上街，試問經濟同樓市若果有乜差池，上街人數仲唔突破老董紀錄？

CY當初鋪路參選時落區氹香港人呃民意，又話樓市過熱時會做野，仲會多建公屋加快輪候上樓時間，唔少中產都擔心樓市不穩影響經濟，但經過前日40萬人身體力行表態，孫柏文相信CY將會係地產霸權最大擁護者。點解？如果唔係，負資產重現，到時隨時40萬變100萬，咁CY唔止要腳痛，仲要頭痛手痛全身包繃帶咁落台。

而一直撐CY嘅二線地產商如恒隆（010）、瑞安（272）等，就當然係新地產霸權最佳之選。

美國11月將會舉行總統大選，奧巴馬為角逐連任，坊間傾向預料聯儲局會推QE3，刺激經濟為奧巴馬助選，你夠膽沽樓呢啲收息固定資產，隨時被挾到飛起，所以未來數月都無可能推倒樓市。孫柏文大膽估計，呢個羅湖版奧巴馬CY，10月既首份施政報告，相信亦只可派糖，唯一可以做，就係派得比煲呔多。假戲假做嘅CY，最終只會同奧巴馬一樣，空口話Change，最後乜都Change唔到！

孫柏文

獨立股評人

本欄逢周二、四刊出