爽報 (財經V37, 2012.7.11)

今日飲茶已有人問，今個星期人行係咪會減存款準備金率。我又唔係人行，點知喎。不過當市場已有呢個預期，呢個預期會影響市場嘅結果。央行運作，就係要出奇不意。故人行一個月內連續減息兩次，令出奇不意嘅難度提高好多。

講到尾，大陸經濟問題並唔止貨幣政策咁簡單。其實由加入世貿至今，除最初幾年有高速實質增長，去到七、八年前開始，大陸經濟發展又再返回信貸帶動嘅經濟周期；每次周期，結果都要用更大刺激措施去救市。呢個循環，去到今日，放大信貸嘅階段嘅問題係：刺激究竟要幾大？

另一因素，就係外圍有幾大鑊，不過冇人講得實。所以人行可以點做？我諗佢哋都唔知。如有人話知道人行會點做，真係先知囉。

講開歐洲，西班牙同意大利嘅情況，真係唔理想。歐洲最大問題，已唔係邊個國家會出事，而係幾時蔓延到全歐洲。當個個都以為德國可獨力撐起成個歐洲，冇人問吓，如德國頂唔順又點算？又或者，德國唔肯頂又點算？

所謂救援方案，每個國家都要出力；例如，如果意大利要同歐洲各國攞錢，每1蚊入面，有1毫7子係意大利畀嘅。係咪好奇怪呢？更加怪係，如果個個都要攞錢，就個個都要畀錢。但如果有錢畀，又邊有人要問人攞錢呢？

美國除有熱浪，樓市繼續麻麻哋。早排加州小鎮Stockton宣佈破產保護，其實都係樓市不振令地方政府收入大減所致。不過，我覺得呢個都係好事，至少美國可有地方政府破產，唔會影響到個「大陣」。相比起歐洲，由一個地方燒晒成個聯盟，美國就係聯邦政府唔得，連累地方。咁大陸呢？

利世民

專欄電郵：SharpHK.Simon@gmail.com

Facebook專頁：www.facebook.com/AppleSimon