爽報 (財經V37, 2012.8.31)

噚日，朝早有消息話思歪特首會推出港人港地，搞到地產股全線冇運行。

原來，港人港地講吓就算，真正重點都係前朝留落嘅置安心同居屋貨尾。有朋友話，思歪搵野來搞，都係想開學前分散下大家嘅注意力，唔好畀份份報紙都係學生絕食。咁又係，學生絕食呢個題目，向來都係新中國政治大忌。

講返思歪所謂嘅樓市措施。有人話，連房委會攞180個單位出來咁大把，都要講一餐，一睇就知技窮。不過，我就留意到兩樣嘢：

一，房委會工廈轉住宅，以思歪夠膽死嘅脾性，應該話：「我聽到市民訴求，所以決定拆鬼晒房委會工廈，變成50層高嘅公屋。邊個反對，就係高樓價幫兇！」但係，思歪竟然話，考慮到地區人士想保留H型歷史回憶，所以保留工廈原結構及外貌。咁怕事嘅思維，睇來係公務員手筆。似乎，思歪終於學識同個制度妥協。

二，加快審批預售樓花，發展商真係拍爛手掌。我一早都話咗，思歪嘅階級敵人，並唔係地產；佢成世人都係靠地產開飯，下意識點都會做啲嘢去幫發展商。可以加快預售，貨如輪轉，我係發展商嘅話，見到外圍咁差，都會想快啲套現。呢個思歪特首，認真唔話得。

至於港人港地，慢慢研究啦，到時都不知人間幾何。

李兆富

專欄電郵：SharpHK.Simon＠gmail.com

Facebook專頁：www.facebook.com/AppleSimon