爽報 (財經V34, 2012.9.04)

恐慌性拋售，我明。但係恐慌性買入，我就真係聽到一頭霧水。

運輸及房屋局張炳良局長話，市民唔需要急於恐慌性買樓，因為政府大把貨。

先撇開究竟政府嘅「大把貨」，其實有幾堅，但係恐慌性買樓，聽落真係有啲得人驚。

任何商品，唔一定永遠有價有市。有時，錯過咗套現嘅機會，可以一世做蟹。

恐慌性拋售，因為大家對某種資產嘅未來，悲觀到極點。最終結果如果唔一樣，只可以話，係睇錯市，但唔一定非理性。

但係，持有現金，就算話鈔票購買力會被通脹剝削，大不了每年蝕幾個巴仙。但係高位買錯，風險就一定唔止幾個百分點。其實，現金唔會咬人㗎喎，點解要恐慌性買入呢？

「你又知樓市一定會跌？」升定跌，我唔知，但係我知，償負能力可以變化得好厲害。好多人淨睇利率，話低息環境唔會變，唔使驚。

不過，我覺得最重要嘅因素，係收入。就業環境變差，成個樓市可以好快轉弱。事實上，好多行業今年市道已經一般。政府除咗苦口婆心勸人要量力而為，其實真係冇乜可以做。

呢個時候人買樓，又或者加快審批樓花幫發展商出貨，到市況逆轉時，恐怕又係一個政治計時炸彈。

李兆富