蘋果日報 (財經要聞B09, 2012.10.16)

 

早排民企風暴，股民睇好多高息、低PE股嘅感覺，有如孫柏文落盧押道睇靚女一樣，越靚越有機會係男人，即貨不對辦，係假嘢。

所以今日我叫大家一注獨贏買合和公路基建（737）。合和系屬老牌香港藍籌，盤數信得過，業務仲要因係營運公路非常清晰。兼歷史派8厘息，睇落非常吸引，QE3下，有肯定派息、唔會走路就有人追追追。

 

唔信共產黨滅亡

當然，市場唔係傻，咁高息係因為有憂慮。擔心啲乜？就係派息減少。係，佢哋嘅客，即行走嘅車輛數目，年年都升，不過可收嘅路費就可能會減少，淨係之前話黃金周要免路費（假設流量唔增加）都令來年收入減3%。又因啲公路喺廣東省，省政府早前減重型汽車收費（假設流量唔增加）又令收入減百分之十幾。市場就係驚政策變。

合和公路就係靠BOT，即興建完、營運數十年、之後轉移畀政府嘅政策。呢個政策好嘅地方就係大幅減低貪污嘅可能，同確保基建項目唔係經濟上非理性咁亂起。

當今祖國，最高調嘅貪污後遺症就係基建，例如高鐵出事或公路倒塌。民怨已到沸點。試想港島到九龍得一條隧道，而隧道因豆腐渣工程，塌陷而要停用，港府勢必倒台。講畀大家知，共產黨面對嘅政策選擇亦一樣。繼續想為自己締造貪污機會，諗住老婆、小朋友已離國，最終喺問題十年八載後令共產黨政權受壓，係有太子嘅十八大後新一批國家領導想見到嘅終結咩？

想監工有力嘅私人企業繼續參與？就要錫住啲私人企業，唔可以恰佢，即唔可以再亂改合約裏嘅利益保證。即係買合和公路，就係你信共產黨員想黨能繼續執政，唔想政權滅亡。我就信，兼想袋起碼6厘股息，仲要如果股息不變，但股息率跌到3厘，股價就要由現價4.21元升一倍，升穿8蚊。所以一注獨贏合和公路！

 

孫柏文

獨立股評人

http://facebook.com/shuen