蘋果日報 (財經要聞, 2012.12.18)

由上個禮拜二開始，我收到四方八面嘅來信同短訊，都係問同一條問題：「隊長！抽唔抽得過？」特別係從facebook《白銀戰隊》討論網頁嘅隊員。咁究竟問邊隻？咪就係正準備上市嘅中國白銀（815）。大家一定諗：「孫柏文成日話一注獨贏買白銀，今次仲唔狂推一隻做晒六分之一地球人白銀嘅公司？」

間公司做嘅生意，就係從其他公司買入含白銀嘅沙石，之後加工提煉成白銀磚及其他物料。公司睇落冇乜嘢，不過如果你係白銀戰隊隊員，睇完個名之後就想買。舉個例子，如果睇好黃豆的話，咁我就今日落街買部整豆腐花嘅機，之後成立一間叫「中國黃豆」嘅公司，舞佢上市畀你買。

原材料升　可贏大錢

你淨係睇江西銅業（358），開礦嗰part有錢賺，而提煉嗰邊就成日輸。點解？因為一有鄉鎮知你提煉有錢賺，就個個蜂擁設廠。之後全行over capacity，蝕都照做，因為要維持現金流去還借來建廠嘅錢，跟住就間間公司都嗌救命。

仲有，做間咁嘅公司其實係可以喺原材料大升浪贏錢。點做？以前沙士後第一份工喺塑膠貿易行做。當時石油每桶賣三十蚊，老闆話要現代化管理，話要做到零存貨。我呢個當時每粒鐘冇28蚊嘅後生，就建議有越多存貨越好，仲要生產上越易，冇乜科技嘅塑膠，因為同石油敏感度高，油價將會升到冇人信。當時老闆好有禮貌咁叫我有乜其他橋再搵佢。

點都好，當你一路保持大量存貨，當白銀價升，啲含白銀嘅沙石都會升。咁你公司就因存貨升值而大賺。

咁關於存貨，呢間公司點講？佢哋就好填鴨式咁話會盡力減少。當然，俾我呢個明燈照一照，呢隻股就好大機會第一日掛牌時爆升。不過你真係抽的話，就祝你好運。

孫柏文
獨立股評人
http://facebook.com/shuen
本欄逢周二刊出