爽報 (財經V30, 2013.01.09)

世界有兩種做嘢模式：一，定一個標準，然後做到99.9999%；二，落地開花，然後經自然淘汰，搵出新方法。

第一種模式，定個框框，做到最好，多快好省。不過就唔可能有新意，只有量變，唔會有質變。教育絕對唔可以行第一種模式；香港最大潛在危機，係教育嘅目的都係大量複製同一種學生。文憑量化寬鬆，就係大量複製標準學生。香港雖有八間大學，惟相對以前兩大再加幾間大專嘅年代，今日出品嘅大學生，既冇以前嗰種對院校嘅自豪同歸屬感，亦少咗份獨特性。以前嘅大學同大專，十隻手指有長短，但自從統一收生，由中學開始教育已變成倒模式大量生產。我真係睇唔到，純粹增加學額對香港教育質素可以有乜嘢好處。如要根本改變，就唔可以缺乏國際私立大學。「香港已有幾間私立院校提供本科學位課程啦！」坦白講，無論政府點樣洗腦，都改變唔到新高中文憑試（DSE）係政策災難嘅事實，故有遠見亦有能力嘅家長，都將仔女送去其他地方升學。國際私立大學嘅意義，在於收生程序可唔跟香港嘅統一收生。現有幾間土炮私立大學，好可惜都係用DSE收生；換言之，對學生嚟講，呢類私立大學只係現存八間大學嘅次選，並非真正另類出路。

貨幣政策都係一樣，當年尼克遜背棄美元兌黃金保證，海耶克就提出，除回到金本位，另一個可能就係容許民間發行有競爭嘅貨幣。香港高等教育，已唔可能有「金本位」，剩低嘅救生衣，就係國際私立大學嘅出現。

李兆富