爽報 (財經V27, 2013.02.28)

財政預算案，簡單講，算係中規中矩。有兩樣嘢要讚：一，財爺聽咗我哋獅子山學會由2007年開始嘅建議，畀錢香港叻仔叻女去外國讀書，唔使俾教育壟斷困死；二，財爺為香港下一代福祉，否定政治議員以退休金為名，搞共產式種金。

共產式種金有乜嘢禍害？睇得呢個專欄嘅一定知道；至於教育霸權，我比較少講，值得花少許筆墨。話說，回歸前後，政府為換取各個專業界別支持，將執業資格大幅收緊，好聽啲叫本地化，坦白啲叫封閉主義。會計、法律、醫生、測量甚至教育，漸漸變成本地薑嘅世界，本地大學亦即係教育霸權，成為培訓專業嘅壟斷；本地大學同專業組織結合一齊嘅政治能量，大到特區政府每年都要利益輸送畀佢哋，金額亦絕對唔少過大財團賺嘅錢。過億身家嘅醫生、每日收費六個位數字嘅大狀、住山頂獨立僭建屋嘅測量師……呢班專業利益共同體，本身都係社會財富嘅1%。唔係憎人富貴，只係睇唔過眼，一班富貴偽君子，日日喺道德高地，將所有罪孽都推卸落有錢人身上。至少，做生意有競爭，做專業人士，競爭少好多，但偏偏就係呢啲專業人士日日指住生意人話壟斷，就睇唔到有人指住自己。

供香港叻仔叻女去外國讀書，好處係令社會點都有班精英，存在壟斷圈子之外。雖然今次人數少，但當年大清政府以官費保送出國嘅學子，何嘗唔係少數？呢類計劃，大有錢佬應該支持；我覺得，可以有個好名，叫做「希望疫苗」。

李兆富