爽報 (港聞V04, 2013.03.13)

本少爺對所有政治演員，都一視同仁。不過，有一班特別敗家，點都會鬧多兩句。

昨日，走在皇后大道中，長江中心外，見到一幅自由黨街板，以小學雞字款大字標題：「中小企火熱水深．財爺漠不關心」，下款就有田北俊、方剛、張宇人與易志明等人（而我不知易志明是誰）。

做生意，有邊一刻唔需要掙扎求存？當然，如果你好似自由黨，成班二世祖，梗係唔需要自己去搏殺！最抵死係，自由黨，將二世祖心態，推而廣之到全港所有中小企，以為人人都攤大手板等人打救，納稅人又點可能認同？

細有細攞福利，大有大攞着數，最後你話邊個埋單？我話自由黨係共產、地產之外嘅第三產：敗家產，真係冇話錯佢地。不過，自由黨嘅原罪，係佢地從成立嘅第一日開始，就相信香港有普選就一定向左。

或者，曾幾何時，佢地都有諗過，可以用空間換取時間。不過，心態上諗住等阿爺派餅，又點可能做得大？人家民建聯同工聯會，擺明車馬以飯票換選票，都要努力去插樁腳。自由黨班二世祖，就個個自己對號入座，係都要話自己係代表少數生意人，結果梗係自我邊緣化啦。

最後，對唔住，自由黨係反福利，但唔代表佢地支持自由市場。我最㷫係，佢地攞咗自由黨呢個好名，搞到有朝一日我要組黨，都要諗過第二個字號。

李兆富