爽報 (港聞V06, 2013.04.22)

「香港建設得好係靠班工人，香港冇有錢佬冇問題，但冇工人做嘢，香港絕對唔會咁繁華」。噚日《蘋果》報道碼頭工潮，訪問一個媽媽；呢位潘太帶個仔仔去捐錢支持罷工時如是說。

冇有錢佬，社會有乜唔同呢？當然，香港越來越多人相信，有錢佬佔據晒啲財富，如果社會冇晒有錢佬，財富就可以均分，人人都係有錢佬。財富，唔通真係罪？有人話，財富唔係罪，只不過大有錢佬獲得財富嘅手段，令到好多人要付出，所以係罪。究竟大有錢佬係點樣變成大有錢佬？靠偷？靠搶？

有人話「以本傷人」，富者越富，皆因有錢佬可以用錢去打擊競爭對手。坦白講，如果「以本傷人」等於將貨物賣得更平，出高人工請有能力嘅人，我想請問，究竟有乜嘢問題？欲加之罪，何患無辭？定係好多人一早已經將大有錢佬定罪，然後先至將各樣事情，甚至道聽途說都當成罪證。

當一個社會普遍覺得，財富要透過政治去分配，而唔係透過市場去創造，呢個社會就越來越多政治，越多財富再分配，就越少財富創造。

工人有貢獻，資本家唔通一啲貢獻都冇？幻想中嘅烏托邦，人人都可以過好悠閒嘅生活，但又豐衣足食。過去一百幾十年，好多地方都試過將資本家趕盡殺絕，但係人民並冇共富，只有共慘。

李兆富