爽報 (港聞 V08, 2013.05.15)

思歪特首寫網誌，話佢同街坊都唔明，點解溫和派泛民，反拉布又反剪布。言下之意，就係叫溫和派泛民唔好與民為敵。管治雖然一塌糊塗，但共產黨出身嘅思歪，權術實在高明。

有獻世派嘅鐵票，政府根本唔需要泛民就範。思歪出手，其實係要挑起泛民內部矛盾。拉布剪布，其實都係一場政治表演。拉布四人組，好清楚支持佢哋嘅社會棟樑，民主係手段，共產先係目的；一聽到派錢，就精神亢奮，最好全民種金，永遠人人都有錢分。

支持泛民嘅市民，又未必個個都係咁單純。曾幾何時，民主陣營得一個歷史使命，就係確保回歸後嘅香港唔會淪陷。至於淪陷點解，我就留番畀大家自己去解讀。好多人未必認同民主派越來越左嘅思維，但始終肯定民主派比其他政黨，更堅持捍衞香港獨特性。

捍衞香港獨特性，除咗普選同法治，仲有一個因素，就係穩定公共財政。假如有一日香港被福利拖垮，破產要北京放水，到時仲剩低啲乜？泛民俾社會棟樑騎劫，要自毀用經濟建立嘅防火牆，究竟係無知定係無間道？

李兆富