爽報 (港聞 V10, 2013.06.14)

噚日，立法會邀請各界對政府先斬後奏徵懲罰性印花稅發表意見。會議前，有近1,000名地產經紀示威。

印象中，就算八萬五，地產經紀都只係逆來順受。當年我曾經問過一位地產經紀，對爛市有乜睇法，佢一貫積極進取咁話：「始終人都要有瓦遮頭，只要有呢個需求，地產就有得做。」噚日亦有地產經紀自己都話，以前生意再差，佢哋都唔會覺得自己係受政府迫害；最多都係覺得時勢不佳，捱吓就會雨過天晴。今次，係人為政治錯誤，忍無可忍。

又有人話，唔係要打擊樓市，係要打擊炒家啫。不過，炒家同用家點分呢？從政府立法嘅舉動，但凡有多過一層物業，就算炒家。

其實，今次政府透過各種懲罰性印花稅打壓樓市，明顯出於行政方便考慮。事實上，政策設計同執行由庫務科去做，政治問責就係發展局。政策設計同執行，當然係越概括越好，越少潛在漏洞就越好。至於政策有冇功效？做咗嘢就算交差。

調控樓市嘅最終政治任務，就由完全冇運作政府行政機器經驗嘅陳茂波負責。有小道消息話，政務官對思歪營問責官，已經好氣餒。家陣審議嘅印花稅修訂條例，一係就犯眾憎，一係就政府知難而退，撤回議案。無論點樣，政府都一定輸。思歪政府究竟諗緊乜？

李兆富