蘋果日報 (財經要聞B09, 2013.10.29)

啱啱過咗嘅周末，孫柏文有個大學老死結婚，就去咗花旗國鳳凰城出席婚禮。呢位老死搵咗親生細佬做伴郎，而鬼佬結婚，就興伴郎致辭，今日一定要分享當中一句。

鬼佬婚禮主家席只有對新人同班兄弟姊妹，一排坐喺台上。伴郎致詞介紹台上人馬時，指住自己同主家席話：「今晚台上一共十人，護士、老師各一，有三個醫生、兩個律師同埋兩個大學教授……」講到呢度，台下掌聲如雷，跟住伴郎就繼續：「大家試想像吓個學生貸款額！」都未講完，台下就大笑，新郎哥再加多句：「係呀，直頭係一個小國嘅GDP！」

一畢業孭200萬債

咁喺晚宴之後，班兄弟喺佢哋嘅酒店套房搞咗個after party。我作為全房唯一冇飲酒嗰個，就同一位除咗高踭鞋都同我一樣咁高、年紀細我少少、喺加州做律師、露三吋事業線嘅洋妞姊妹坐喺沙發傾計。佢笑住話其實個笑話好到肉，一個花旗國法律學院畢業生，一畢業已孭住成200萬港元嘅債，最弊係錢唔易搵。咁我同佢分享我做啲乜嘢嘅時候，佢就問我知唔知美國學生貸款負擔有幾大。我答：「其實新郎哥錯，因為計埋政府靜靜雞收埋嗰啲，美國學生貸款一萬億美元總和，係香港財政儲備嘅八倍，遠超小國GDP。」咁佢皺眉，我就解釋乜嘢叫財政儲備。呢批學生貸款，應該會令花旗國後生嗰代唔敢博，最後冇人博做新嘢，拖垮花旗經濟。

之後，我哋討論大學讀書值唔值。我望住佢眼話：「其實大學最值回票價就係去識啲真朋友，之後構成自己嘅人際網絡。如果當年我冇去美國讀書，識到新郎，我今日都唔可以坐喺到識到妳。」佢望住我眼，微笑，輕輕搭我手臂問：「After party之後你有乜嘢搞？」我聽到後深呼吸，停一停，望一望天花，再望住佢答：「搭咗廿幾個鐘機，好累，返房盡快瞓。」

清醒，多好。

孫柏文

獨立股評人

http://facebook.com/shuen

本欄逢周二刊出