蘋果日報 ～ 金手指 2017-09-11 孫柏文

金手指：管ICO庸人自擾

啲睇淡日本嘅人（包括孫柏文），講到日本步向滅亡嘅證據，其中一個最鍾意用嘅數字，就係幾年前日本成人尿片嘅銷售量，超過咗兒童尿片。咁嘅數字，so what？要著成人尿片，即係腦已退化到連屎尿都控制唔到。當個腦係咁，又點返工生產呢？點交稅去還國債？

還唔到？佢哋印銀紙去玩咪得囉！唔知係咪好多人都係咁諗，所以呢期喺日本啲已比特幣為首嘅電子貨幣非常搶手。甚至全世界都好搶手，喺大陸直情好賣到被禁。

當然，呢啲電子貨幣冇成本，你鍾意聽日都可以整隻。就係因為咁，世界忽然湧現幾廿百隻。而當隻新貨幣登場，佢哋就要做個Initial Coin Offering（ICO），招幣買家。

唔知係咪英文簡稱係I乜O，所以budget多到唔知點使，要搵理由繼續cap水嘅證監，就話「可能係投資」，所以要管！咁我又真係想知，點解係投資呢？

如果有國家政府有新貨幣，來香港吸引人去買，係咪要問過證監呢？當然唔使啦。原因係貨幣本身係冇回報。要成為投資，要嗰樣嘢有息、有租金收入等。齋因啲嘢嘅價升，就要管，證監上下幾千人真係開心到夢遺。

當然，如果港交所他朝有間公司上市，股價係用比特幣計價，呢間公司嘅股票就要管。不過算啦，香港有資產嘅人，賭乜輸咗都一定會去證監示威博政府賠。

就係因為有人特登亂屙屎扮賴屎，證監又越多人扮越多budget請人，所以香港人人被假設腦退化，要著尿片兼鎖上床。香港人喺林鄭呢十年嘅座右銘將會係「這些機會不會屬於我們的」，看吧。

撰文: 孫柏文 獅子山學會創辦人