蘋果日報．金手指 ／2019-08-13／孫柏文(獅子山學會董事)

2015年11月23日凌晨，孫柏文記得攰到瞓咗喺區選點票站對出嘅一張長椅。我當時參選，啱啱開票知輸咗。競選團中，一名義工走埋來問我感受如何，我答：「盡咗力，講晒心底嘅說話。走，都問心無愧。香港為我做過嘅，今次後再冇拖冇欠。」

我又記得今轉6月第一次百萬人示威，外國傳媒訪問個企喺維園嘅後生仔。問佢示威希望會有咩成效，佢諗都唔使諗，就話：「唔會有。」咁記者再追問點解要走出來，佢答：「我要知自己已盡咗力。」

同大家一樣，我都唔知會點收科。更唔想諗後遺症會係乜？不過，今轉應該係一次畀大家香港人清楚睇到自己前路點行。

2017年，BBC電台搞咗個回歸20年節目，請咗啲同香港有關嘅人上去傾吓。當時我坐喺「聯滙之父」Greenwood 旁，話：「香港將會踏上黎巴嫩之路。」當時一講，俾主持人寸話：「有冇咁誇張呀？」

我補充話黎巴嫩曾經被譽為「中東巴黎」，中東最開放嘅金融中心。因人口比例嘅變遷，變成今時今日咁。不過我話黎巴嫩人各散東西，都能保自己嘅本質。例如墨西哥首富，都係黎巴嫩裔人。

最後，當年科大成立廿五周年時，請咗我最欣賞嘅歷史學家Niall Ferguson做講者。我有去，亦問咗觀眾一條問題。我話：「根據你本《The War of the World》。只要出現帝國邊疆移動、唔同人種存在兼互相覺得對方比人不如、同埋經濟動盪，就會有大屠殺。香港出現緊呢啲症狀，咁香港會否出現（咁嘅結果）呢呢？」

佢笑一笑話：「聽日我喺上海都要演講，呢條問題應該聽日唔會有人問。」之後就話唔會，因為香港人同大陸人係同一種人喎。

呢轉都應該係最唔黑天鵝嘅黑天鵝了。