有線電視截圖

財政司司長陳茂波日前接受外國傳媒訪問時表示，不排除會開徵銷售稅。不論係出於任何原因，任何市民亦應堅決反對。

一、劫貧濟富銷售稅

銷售稅係累退稅，收入越少嘅人，所繳嘅銷售稅額，佔其收入比例越大，因為銷售稅技支出計算，始終有基本生活開支。即係話，收入越低，繳交銷售稅佔人工比例越高。香港的稅制，設計上大有能者多付出的功能，稅網以外的打工仔，甚至乎可以完全唔使交稅，好微妙咁平衡社會貧富之間的差距。明明係一個制度平衡上嘅優點，因為一次財赤而要破壞整套制度。

二、退稅引爆中港矛盾

全球大部份有銷售稅嘅國家，都會有外國人嘅退稅機制。可以預期，香港有功能組別既得利益嘅情況下，為咗傾斜旅遊同零售，都會同時進行外國人退稅，離境嘅時候可以退回銷售稅。

香港其中一個中港矛盾：叫自由行。總結自由行多年，香港人嘅不滿在於，冇直接受惠；自由行代購引發衛生及地區街道阻塞問題；最重要係，受訪自由行恩主心態，買完嘢，冇講Thank You，仲要講「要不是我們來消費」之類嘅晦氣說話。

舊年6月開始，香港市民對中港矛盾民情大爆發，暫時未見政府有任何措施紓緩中港矛盾，如果開徵銷售稅，將會係香港人本土抽稅，自由行免稅。請想像以下情景：

電視台訪問一個離境剛辦退稅的自由行旅客，然後在鏡頭面前話「全靠我們來消費，香港經濟才從武肺中復甦，香港人要感恩。

在電視機前嘅香港觀眾，則在飲食消費之中交緊銷售稅。

試問咁嘅施政，點樣紓緩社會矛盾？

三、破壞政府自我監察嘅機制

十幾年前，政府意圖推銷銷售稅，祭出「稅基狹窄」為理由。十幾年過後，獅子山學會可以話你知，稅基狹窄係優點，因為呢個係一個機制，去令政府由收入同開支上自我監察，如果管治得唔好，令收入降低，政府必須改善施政，可以話係一個「積極不干預」之下嘅自我調節機制。當然，過去財政盈餘太強勁，二十二個月經常開支儲備令政府已經忘記積極不干預，市場自行發展促進經濟，政府財政收入先會增加。取而代之係逐步伸手干預市場。

今次出現財赤，某程度上來自中國經濟放緩，依靠一注獨贏自由行嘅模式已走到尾期，但過去大半年嘅社會運動，以及近月疫情擴散，係不良政策帶來的反效果，以及對疫情處理緩慢，唔肯果斷處理，本來果斷嘅話只係損失旅客生意，拖延之下連本地消費都因唔敢出街而大跌。施政的失敗，直接影響到財政收入。政府再次一如以往，冇檢討自己的過失，反而向市民開刀。

開徵銷售稅，擴闊稅基，除非不吃不喝，否則政府坐定粒祿已有基本收入，唔會有誘因去改善施政，銷售稅只係開端，政府收入包底後，更多大政府政策，陸續有嚟。所以必須要係放風開徵銷售稅之時，立即堅決反對！

祝越山

獅子山學會研究員