蘋果日報．金手指／2020-06-30／孫柏文(獅子山學會董事)

美帝薩凡納大學SCAD嘅香港分校執笠，令孫柏文好感觸。始終我住深水埗天台屋嘅年代，每朝起身打開門，就會見到當年吉咗喺度嘅前北九龍裁判法院。

呢單執笠事件，最主要解釋係「貴」。今時今日，啲文憑不但五花八門、奇奇怪怪，仲要勁濫發。隔離李世民，就係coin咗「文憑量化寬鬆」一詞去形容。每間大學，就有如間央行，各印自己嘅文憑。好似好多貨幣咁，印得多、唔值錢，就會爆破，連間央行都執埋。當然，雖文憑越來越唔值，不過只要夠平，例如被大幅補貼，都仲會有大把人讀大學。當年我讀大學時係李世民嘅同學，佢當年同我話文憑最大嘅功能，就係signal畀啲未來僱主，你有能力爭嗰位返來。冇僱主會預你喺大學學到嘢。

我今日就會加多句，去讀大學嘅最大價值，係為咗結交多啲人。多唔好講，讀書做醫生確係搵食保證。不過讀邊間大學，好多時連邊個最終做你配偶都好大影響。香港以前有好多母親唔畀啲女留學，驚「學壞」喎，即係驚佢濫交，降低佢出嫁時嘅「價值」。不過我只要話，facebook老闆娘，當年就係讀大學去party時，排隊等廁所，識到佢老公。

不過點都好，大家會陸陸續續見到全球好多大學執笠。呢個文憑泡沫爆破，唔知紙幣嗰個幾時爆呢？