孫柏文- am730 (大明燈, M30, 08/11/2010)

大家樂(341)管理層決定取消食飯無薪措施，而且加咗嘅人工照加，雖然星期二嘅罷食行動因此取消，但大家樂嘅形象已嚴重受損，由「價廉物美」淪為「壓榨工人」嘅大本營，成件事主席陳裕光應要負全責。

陳裕光受邀出任臨時最低工資委員會委員，雖然被工運議員認定係「官商勾結」、「壓低工資」，但最初只有零星反對，直至陳裕光以上市公司主席身份表示，最低工資水平如果喺33蚊，會令大家樂發盈警，上市公司主席有責任披露呢啲資料，但身為最低工資委員會成員，咁講就係「恐嚇」。

結果由嗰日開始，大家樂就變成邪惡資本家，政府置身事外。發展至今，唔單止損害公司嘅形象，更加令取消咗嘅罷食，變成好多人自發嘅行動，直接影響公司盈利，陳裕光為咗出任公職，令到上市公司萬箭穿心，陳主席已證明不能保護萬千小股民利益，應立刻引咎辭職。求神拜佛股壇長毛冇入股，如果唔係更會昇華為國際焦點。

呢件事嘅教訓就係，政府叫你做呢啲會影響社會和諧嘅職位，所有上市公司主席都應該向政府說不。向西望一望花旗國，呢個舊年工會「成功爭取」加最低工資嘅地方，少數民族年輕人達五成失業率嘅社會，就可明白箇中理由。

但更應該辭職嘅係立法會飲食界議員張宇人，呢個九流飲食界代言人，不斷自我妖魔化業界形象，令無數為新移民、畢業生提供職業階梯第一份工嘅食店老闆，由香港夢推動者，變成邪惡軸心。做業界代表做到咁，如果係其他職位，已經炒咗啦！
試諗下，今次食飯時間薪酬爭議，根本同立場無關，只係「最低時薪」立法時的技術細節，自稱研究最低工資幾十年嘅李卓人，好似望都冇望過咁就舉手通過。如果張宇人所屬嘅自由黨當日投反對票，今日已可以大罵李卓人、民主黨、工聯會係舉手機器，連食飯時間呢個巨大「法律罅」都冇堵塞嘅情況之下，咩都唔睇就支持，喺審理草案上失職，支持一條令工人工資更少嘅法例。

但張宇人冇咁做，見大圍支持，佢又走去支持，因為自由黨主流都係少爺兵，見慣依靠炒賣配額發達嘅商人，認定工人同僱主嘅地位是階級鬥爭，老闆一定係要靠特權剝削工人先可以有錢賺。

其實，工人同僱主係一隊球隊，僱主係教練，工人係球員，大家坐同一條船去同其他公司競爭，而工會就希望見到嘅係一個冇競爭嘅聯賽，人人都係按工會嘅本子辦事，唔能夠透過自身嘅努力去力爭上游，工人永世都做工人，惟有靠埋工會堆先有得加人工。

飲食界給予無數香港人第一個工作機會，喺職場上車，但張宇人令呢個行業淪為笑柄，食店老闆淪為過街老鼠，下一屆立法會選舉，自由黨係時候被瓦解！

作者為前石油業證券分析員，視股市為終身學習場所，不斷交學費。