孫柏文- am730 (大明燈, M34, 15/12/2010)

「庸官」兩個字，對我哋呢啲特區人來講，多數喺啲抽水議員口中聽到。其實咁樣鬧，好多時都係啲官之前做咗啲嘢，做嗰陣仲有大把抽水議員嘅掌聲添。不過，最後發覺好多議員讚嘅舉動，原來係權宜之計，最終因最初冇勇氣大啖大啖咁將苦口良藥飲落肚而出事。出事後，班抽水議員就會患嚴重失憶症咁，忘記自己拍過掌，跟住就「庸官」前、「庸官」後咁問候人。

喺08年嘅愛爾蘭，當時佢哋銀行嘅債主，如存戶、債券持有人等，都因為覺得啲銀行唔掂，攞錢走人玩擠提。咁當時有少少財經知識或睇開我專欄嘅人，都應知道愛爾蘭啲銀行通通唔係周轉不靈咁簡單，而係間間都係資不抵債，應該執笠。點知當時啲官員可能冇睇我個專欄，更冇財經邏輯，故冇幫銀行啟動清盤程序，而係宣布政府將全面保證啲銀行。銀行還唔到，政府還。一出招，銀行外面想攞晒啲錢出來嘅人龍即時消失。甚至引發全球資金湧往愛爾蘭，令其他地方如香港亦被迫提供百分百存款保證，如果唔係就留唔住啲錢。
當時愛爾蘭啲議員，甚至國際傳媒勁讚政府當機立斷，一招「解決」擠提問題。大家試想，喺特區發生嘅話，政府係咪又會聽到好多抽水議員嘅掌聲呢？點知到今時今日，原來啲銀行真係資不抵債。政府根本唔夠財力幫銀行還債。政府不但迫今日、明日、大後日嘅納稅人幫手還錢外，仲要迫愛爾蘭版嘅強迫金基金一齊救。
一百年前，以流血換番來嘅主權，一個政府保證就冇晒。議員依家先識鬧。佢哋仲唔係庸官？仲唔係抽水議員？講真我哋唔好笑人，因香港大把。如前日終審庭交代點解大埔街市投熟食檔圍標會無罪，就係最佳例子。點解咁講？年年政府都有拍賣熟食檔，但冇人圍標，呢個冇人圍標嘅拍賣，就係每年維園年宵熟食檔。佢哋冇人圍標嘅原因，係因為你、我、阿豬、阿貓都可競投，除非阻住我入場舉手，如果唔係冇得圍標。
咁點解大埔街市有得圍標？因為你、我、阿豬、阿貓唔可以競投！政府淨係俾喺舊街市已有熟食檔嘅人競投，咁當然出事啦。好啦出事喇，咁政府點呀？告到你甩褲，告到終審庭，仲希望終審庭推翻百幾年來大家都覺得公平嘅案例。為咩？就係當時有個庸官為安撫業界，為討好啲驚冇咗幫襯開食肆嘅街坊抽水議員，就限原有嘅人先可參與。當時個官一定贏咗好多掌聲！不過最後要告人，而唔係自我檢討，就好似為5公頃堆填區，爆立法、行政憲制危機一樣。使唔使呀？政府被圍標抵死！
最離譜係成日話中小企因「唔明」而反對競爭法嘅湯家驊，就話政府要通過競爭法去對付呢啲熟食檔中小企！呢啲中小企，細心研究政府規則後，作出自保反政府嘅反應，湯家驊話要拉。哈哈！

(作者為前石油業證券分析員，視股市為終身學習場所，不斷交學費。)