am730 (大明燈 M40, 2011.4.13)

睇到條題，大家是否想知孫柏文諗緊乜。

係，年老的吳伯，唔想綜援，堅決自力更生，繼續想賣雞蛋仔維持生計，呢個諗法非常正確。不過，就真係睇你邊度製造同賣。如果係霸佔行人路，就一定要拉。

呢個道理，小學生都識，不過今次令全城驚喜地方，係因為阿伯佢連爐都未開，雞蛋仔都未整，食環署已經拉人。真係做納稅人都一定係驚喜！

我血汗錢，居然請到能睇穿他人思想、有未卜先知能力人做公務員！最衰係呢特異功能，會因為人去大學讀法律之後冇。因為未製造雞蛋仔前，食環署就拉，對特異功能無知法官們就會放人。推個爐出街，犯法呀？

不過，如果你係撻著個爐，就唔同計法啦。多唔好講，撞正辣親小朋友，呢個阿伯即時由公民抗命對付地產霸權英雄，變成為錢可以辣傷小朋友都要賺到盡無良商人啦。到時候，涂謹申式抽水議員，就會問點解政府執法不力，罔顧市民安全！同時又會要求政府立法，加強刑罰！

不過再講因為街賣熟食，冇錢租地方做生意，砌木頭車擺街，搵啖飯食，可以理解。

但是，出錢出力租舖的生意人，咁咪好無辜？多唔好講，同一個地方，一個80後同吳伯都有興趣賣雞蛋仔，如果政府網開一面，俾吳伯賣，咁個80後唔到個位賣，咪對個80後好唔公平？如果以先到先得方式，因為吳伯呢位第二代香港人霸個位先，咪又再一次證明特區政府有系統地要第四代香港人死？

再講，如果個80後同吳伯要爭同一地點開檔，係邊個爭贏？唔該大家俾個答案我。
唔通個80後要同吳伯隻揪決定？咁吳伯又可唔可以將隻揪呢個工序，外判俾住佢樓下個專營地下秩序蠱惑仔？吳伯仲會保證每小時俾足28元最低工資，雖然食飯時間唔知點計。

當產權冇政府劃清同保護的時候，地下勢力就會幫手。你班坐屋企，涼冷氣，上上網又話搞「雞蛋仔革命」傻仔們明唔明呀？政府要企硬呀。

想潛水，但最終要交代高盛「烏輪」事件的港交所(388)行政總裁李小加，揀在金利豐酒會上露面，仲講到明會講高盛事件。結果係，李小加話：「保證投資者唔會有損失，會收回投資本金。」

我一聽，就即刻爆粗問，有冇搞錯呀？買輪投資者，應該唔係雷曼兄弟迷債苦主呀。佢唔係輸打贏要呀。

佢只係要高盛履行合約呀。都係句，唔香港大，又要too big tofail美資行出來，法治？口齒？佢唔明就係唔明。